Whatever emotion de prime minister have over what he characterize as misleadin social media stories about crime in Triniland, I toppin.

Eef, as dis Guardian article headline say, he upset, I toppin dat.

Eef he emotion drop, as ah find out when ah read de article, an is only concerned he concerned, I toppin dat too.

However, dis not poker, an ah not callin he concern an raisin it. Instead, dis emotion-toppin ting simply mean eef he upset den I upset he upset. He concerned, den I more concern he concerned. However, when ah squint real good fuh ah few minutes ah able tuh see where he comin from. Only in de dry season doh.

As I tell mih pardnah while we was yellin at one udder tryin tuh get we different points across, why in de name of all dat is Holy —wuss yet evil — is de prime minister not more upset wid de encroachin crime madness?

Not long ago, de ultimate in crime only use tuh infest places de average person used tuh pray dey car didn’t break dong in when dey was parsin. Now dat pray have tuh cover any place people might be changin ah flat tire or does rest dey head when night reach.

De reality ah dat mean yet again people have tuh adjust tuh ah new-normal — ah new reality. What unverifiable crap could anybody post orn social media dat more frightenin?

Sadly de prime minister not alone in openin he mouth an havin dat misdirected emotion jump out. Tuh he credit he try an put it in context by tryin tuh acknowledge people reality. He fail wid me doh cause it eh de dry season.

He right dey wid dis religious leader who, after ah armed robbery, look tuh focus orn one ah de robbers who disguise heself as ah Muslim woman. From de picture I see, no woman, Muslim or udderwise could ever be as ugly. Dat aside, de religious leader rail against de affront tuh he religion. He went as far as tuh suggest de robber’s garb could make de poleece see Muslim women as potential criminals. True, eef de poleece an dem blind. But, de robbery was successful so what’s de point?

Now Rowley is side by side wid dat religious leader in denial ah people reality. Dis eh Rowley first time since becomin prime minister. De previous most recent occurrence being when he was in England an tell members ah de Trini diaspora he disappointed more ah dem eh volunteerin tuh return home mainly tuh fight crime.

Could it be dat he eh totally grasp what crime doin tuh de people? He eh accept dat de fight have tuh start from de top?

For example, why he keep insistin de prime minister doh play ah role in selectin de commissioner ah poleece?

Ent de T&T Constitution say eef de prime minister doh like de nominee fuh de position, dat person dorgs dead? Dat not what happen tuh de current actin CoP when he get nominated an Manning tell him tuh hold he horses, or words tuh dat effect?

I tink Rowley too smart tuh be disingenuous.

Yes, he eh sayin outright tuh pick dis one or pick dat one buh, by havin de ability tuh say, “nah not dis one” or, “not dat one”, how could he insist he doh have ah say in de selection?

Ah suspect what make him speak out is de social media clip of ah room in ah unidentified house in ah unknown location. Eidder de house in Trinidad or who post de video want people tuh tink it is. Regardless, de room bristlin wid guns; upwards ah seventy by my count. De govahment come out an casually announce de house not in Triniland. No proof offered, nuttin tuh reassure citizens. People must believe just so.

Mih pardnah state de subtle obvious when he say it not in de best interest ah de govahment tuh admit de house in Trinidad. I added dat doh mean it in Trinidad.

Of course I doh support people usin social media tuh spread misinformation. Not providin any information just as bard. In fact, no information does lead tuh misinformation gettin lapped up.

Fuh de second time, Trini courts say when it come tuh online mauvais langue, spread it at yuh own risk. Ask de woman who just get fined fuh what she post about ah next woman an she chirren. My guess is it have ah man someplace in de middle ah dat bacchanal but, ah digressin.

Yuh cyar be ah hot head or have tunnel vision eef yuh decide tuh respond to online shit. It have experts at dat. At least one anyway.

Accordin tuh de late Manning, Rowley head does get hot quick an next ting yuh know he is ah ragin bull. An yes, de two ah dem was in de same party at de time.

In Rowley defense, he eh murder Vernella Alleyene-Toppin fuh she statements in parliament about he back in 2015. I refuse tuh provide links tuh dat.

Now he in charge, Rowley style seem tuh favor dat ah de late Dr. Eric Williams. He does let tings rumble an bubble till dey ready tuh erupt. Only den he does bounce in, make stern pronouncements an is gorn he gorn leavin people scramblin tuh analyze he statements.

It doh quite wuk for Rowley. Not when he does sprinkle in hints ah being condescendin. He style more reflective of he trainin so it more “Vulcanist-esque” dan William-esque.

Prime Minister Rowley should be kickin people baxide an not takin no damn names. Pretend dey is Vernella an he defendin de family honor

He should be more upset dat after de gang bill parse, dem gangs still dey. Wasn’t de law vital tuh de poleece ability tuh fight crime? Who knows which part dem fellas, an gyals, is now. Any people in de diaspora had tuh unpack dey bags?

Eef I was Rowley, I would be more concerned why, after all dese years an all de money dat spend tuh change tings, it still have poleece officers who so boldface dey could be releasin confidential information on social media.

Did dat come up in de latest ah he conversations wid de prime minister series. He could have but de press prefer headlines dat sell papers. Corrupt cops does only bring yawns, eef any reaction at all.

No doubt Rowley have ah difficult job. It more so now dan in de best ah times. Ah hope he remember what he say de time he siddong wid Julian Rogersbefore de election. Julian ask him eef he ready tuh be prime minister. After meanderin lil bit about de political environment, he attributes an how it require changes an new leadership, he surprise nobody when he say, “yes I am ready.”

Dem four words galvanize all he supporters eef not at least half de country.

Dat was in 2015.

Now is 2018.

Half de year gorn an murders happenin at ah record rate wid impunity.

Refocus, please?