At dis stage in de current CONCACAF Under 20 Women’s World Cup qualifiers, I only have one question: Will de Soca Princesses finish ahead ah Jamaica? While at de time ah pennin dis is only one game each play, by de time it get read, ah expect T&T would ah done get it second cut arse, dis time from Canada so it more dan appropriate tuh ask.

Call mih ah turncoat, dat is alright buh ah not fallin fuh dis no more. No more will I allow de standard bearers of ah team dat not up tuh snuff convince mih God is ah Trini when in reality de emperor nekkid like ah jaybird.

No offence ladies buh allyuh get tossed in de deep end wid all de sharks an not even ah spear-gun.

Is it even worth tryin tuh figure out how long de Princesses unite de country? Dat is what dey coach suggested dey could as he tried tuh build partisan interest in de team before de tournament.

Was it as long as it take tuh score dem early two goals against Haiti?

Was it as long as it take Haiti tuh score dey equalizer orn de stroke ah half time? Or, what it as long as it take Haiti tuh score ah next goal an go orn tuh humble T&T?

Actually, leh we doh even try an figure out de answer. Not when in dat game all de team manage tuh do was give de country de false hope it could unite at least football lovers.

How many people spend most ah de game hopin?

Hopin T&T could hold orn? Or, hopin anudder solo effort would result in ah next goal fuh T&T.

Instead, everybody watch Haiti settle dong an take over de game. In so doin show T&T how tuh string passes tuhgedder an how tuh attack as ah unit.

Dey eh had tuh show T&T how tuh take advantage ah not being marked inside de penalty box —T&T give dem dat one time an time again at no charge.

Eef yuh was ah realistic Trini supporter an not ah fanatic, it had tuh be painful tuh watch de game live.

De idea ah de team unifyin ah fractured T&T was always ah Hindenburg of ah idea de coach float anyways.

Since me eh see or hear de game live I had ah different vantage point. In fact, even up tuh now all I manage tuh keep still an watch was de first half orn You tube. Takin in dem forty-five minutes, plus injury time, was weird knowin ahead how de game was goin an turn an den watchin de turn happen.

Even in dem first twelve minutes when T&T score it two goals, it was de same set ah flaws common tuh all T&T football teams. Inaccurate parsin an poor first touches now so common people must tink dey mandatory tuh good football. When yuh put dem two shortcomings into ah style ah play dat depend orn individualism yuh get exactly what happen in dis game.

In ah sense it not surprisin. De same standard bearers ah mention earlier does pin dey hopes orn winnin orn factors outside de realm ah reality. So why shouldn’t players believe dey best chance tuh score is tuh kick de ball in de direction ah de udder goal an hope ah player go win it an score. While dat is exactly how de first goal score, de fact is de T&T style ah play was testimonial tuh de fallacy ah dat approach.

So, why ah ask dat question about Jamaica?

Simple. Misery like company dat worse orf dan it.

At first I tort de Caribbean trio of Jamaica, Haiti an T&T was bunched tuhgedder skills-wise in dis tournament an would end up at de bottom ah de heap. However, after T&T’s game against Haiti an ah see how Mexico handle Jamaica, is really only T&T an Jamaica battlin tuh not be de worse team. Trinbago eh go face Jamaica because dey in separate groups so ah not shamed tuh admit ah lookin fuh Jamaica tuh concede more goals, score less an of course lose more games dan T&T. It is all de consolation ah go get.

Let mih farse forward in dat regard. Canada just score fuh de fourth time against T&T. Any hope ah de Soca Princesses gettin one ah de spots out ah dis tournament officially over as dis is dey second lorse. Ah feel so bard fuh de players but dey are products of ah failed system dat eidder cyar change or slow tuh change. De issue bigger dan inter-island rivalry so even as ah look tuh Jamaica fuh solace ah still have tuh ask ah next question:

Why is Haiti head an shoulders above T&T . . . as eef we doh know de answer an is not all about money. Just look back at de parse year fuh symptoms ah some ah de tings plaguin T&T football. Examine de so-called preparations fuh dis critical knock out series  an is apparent dat at some level de need fuh serious match practice was understood. Yet, how many ah dese warm-up games,take place?(Mentioned arong 1:50 orn de clip).

Answer? Zero.

However, dat need fuh realistic competition didn’t seem tuh have made its way tuh de TTFA Technical Director, Anton Corneal. How else tuh interpret how he label de lack ah such games? Someting like ah blessin in disguise he say?

Some disguise.

Eef Canada hadn’t scored ah was goin an call it quits orn de game anyways. Is only so much boot-de-ball-tuhwards-de-Canadian-goal an quick, somebody-run-after-it-an-score-nah, ah could take. Or, ah player takin de ball an goin up against de entire Canadian defense while de rest ah de T&T players watch from ah safe distance.

De preparations Anton tork about had tuh do more dan teach dat.

Eef it sound like ah frustrated ah fail in mih objective. Ah not supposed tuh sound frustrated, ah damn frustrated. No tail too.

Clearly T&T have football talent. De law of averages allow it tuh surface an gel every now an den. Like in 2006 fuh de men’s team. Buh de reality is it not go blossom consistently widout de right environment.

Four years ago it almost blossom again. Dat time fuh de Women Under 20 team as it come wid in ah victory ah makin it tuh dat World Cup. Who beat dem? Costa Rica. Who dis crop ah players comin up against next in ah qualifier where all is done lost? Costa Rica.

Please Soca Princesses, ah beggin allyuh. Win dis one so mih selfish wish ah who go come larse could come true.

Please, pretty please?