RSS Feed

Ah still in Russia tryin tuh decide

Comments Off on Ah still in Russia tryin tuh decide

August 11, 2018 by Fensic

Eidder ah just slow or ah doh want tuh make up mih mind. Ah mean de World Cup done an all de fans reach back home long time.

Not me an I wasn’t even in Russia, physically. Ah guess I is ah procrastinatin straggler when it come tuh dis.

Trinilanders tryin tuh get tickets tuh de latest show starrin de newest national security minister an he too often gun torkin sidekick. Fuhget de fear of de Almighty one ah dem supposedly say, is de fear ah he name go be in dem criminals’ heart, he promise.

Me eh even care eef no scriptwriter could ah come up wid such ah line.

So what eef “Gilligans” Passage finally reach Trinidad an de onlyest ting left is tuh figure out how many days it have in two weeks. Me eh care eef more dan 14 parse since de powers dat be promise Gilligans’ first sailin between de islands go be in “two weeks”.

I cyar study none ah dem tings. Not before ah make mih mind up orn dis one issue. Eef I eh resolve dis I go be ah Black Russian. Hope orn de horizon. All dat have tuh happen is de TTFA keep it up.

What is wid all dese pronouns? What nouns dey standin in for?

Dis start durin de rong ah sixteen. Dat was when ah start kickin arong de idea of eef I should stop watchin . No, not de rest ah de World Cup; de Trinbago version ah de game. Watchin T&T football at international levels eh taxin in joke nah, especially after seein how de game should be played.

When players have de fundamentals an are skilled, experienced an well coached? Knowin how tuh play tuhgedder is more dan lagniappe. So too is makin de real time adjustments needed tuh defend or counter-attack. De complex made tuh look simple. No sport cyar match all dat beauty.

I eh had no favorite side in Russia. Yeah, ah would ah like Brazil in de final, buh ah would ah like tuh see Germany dey too. Or, Argentina. Or, any African team. England? Why not?

Ah couldn’t help tinkin ah de Triniland brand ah de game in de middle ah enjoyin dat quadrennial orgy ah football . It leave mih feelin more frustrated dan disappointed.

Eef ah blank local football I eh go find mihself alone in de enemy part of ah stadium, (which usually is de whole place eh), screamin up ah lung in celebration of ah Trini goal. Usually when ah pause tuh take in oxygen ah does realize everybody lookin at mih shakin dey head in sympathy. Ah know how tuh translate dey torts even eef dey in ah foreign language: Poor fella, he doesn’t get tuh rejoice too often.

No more will I be goin along wid attempts tuh mamaguy mih. Who doh know dat in two years it eh go have no Caribbean team tuh warm up de Soca Warriors? By den all dem udder countries go be lookin tuh have de Warriors warm dem up.

Eef ah stop watchin all Soca Warriors teams across genders an age groups, I eh go have tuh bodder de Lord, beggin fuh de same ridiculous favor. It should ah have anudder commandment prohibitin dat dotishness.

Is not like it eh have serious footballin talent in T&T. Look at de names dat headline de 2006 World up bid. While dem fellas was good, some never get tuh wear de national colors again. Wid dat kind ah pettiness at play de chances ah such talent comin tuhgedder again probably wuss dan de U.S. havin ah next black US president. Tings in T&T football have tuh change.

Twelve years after drawin wid Sweden in dey openin World Cup game, can de Soca Warriors come anywhere close tuh dat again? Tings gorn so far donghill de country no longer de smallest one tuh make it tuh de World Cup tanks tuh Iceland.

All de football stadiums in Russia quiet. In de rest ah de FIFA world tings startin tuh hum as countries ramp up dey preparations fuh vyin for ah spot in Qatar 2022. Ah expect T&T go be one ah dem. Will I be followin de trials an tribulations, even nonsense, an hopin God eh switch nationality? Not at my age when too much bacchanal not good. Sanity more important.

Eef I stay far enough away I eh go have tuh see ah women’s team go tuh ah tournament wid no warm up matches yet make it tuh de final four widout winnin ah match. Based orn what de papers say de team probably was confused into believin less was more. How else it could end it final game wid no shots orn de udder team goal an not even one corner kick?

From dat same safe distance ah wouldn’t have tuh worry about mih heart breakin fuh anudder national team dat eh even get tuh leave T&T fuh it tournament. All de hard work put in fuh naught because it eh get US visas.

Blasted Americans.

Isn’t dat what de head ah de football association like he suggestin?

Buh before I too get carried away, eef I stay at dat same distance I would miss seein de ability an mindset of ah even younger team, dis time boys. Dey show ah kind of killer instinct in mashin up one team 8 – 0 an decimatin ah next side 11 tuh 1.

I eh sure, buh dis “safe distance” must be what dey does call between de devil an de deep blue sea. It must be de water version of between ah rock an ah hard place.

Ah have tuh accept it eh go have nobody tuh replace or match de euphoria ah does feel when ah Trini national football team win ah big match. Rootin fuh de US cyar provide de same instinctive gut reaction fuh some reason.

What tuh do, what tuh do?

Maybe eef ah know when de next big international match outside T&T go be an who de Warriors goin up against? Ah could use all dat tuh help mih decide. 

Maybe ah better not do dat cause who knows eef de team go get it travel documents in time tuh go anyplace.

Steups.

Too much bacchanal.

Ok dat is it!

Ah make up mih mind.

Ah done wid T&T football. 

But only eef ah could change mih mind later doh.


Comments Off on Ah still in Russia tryin tuh decide

Sorry, comments are closed.

Subscribe nah

Enter yuh email address. Yuh go get emails orn new posts.

August 2018
S M T W T F S
 1234
567891011
12131415161718
19202122232425
262728293031  

Various topics

Torkin by month

Follow

Get every new post on this blog delivered to your Inbox.

Join other followers:

%d bloggers like this: