RSS Feed

Fensic like he back or what?

Comments Off on Fensic like he back or what?

April 16, 2018 by Fensic

Steups.

It wasn’t supposed tuh be dis hard. Yes ah went into ah free-fall after de spectacular failure of dis new job ah went an relocate for buh ah did manage tuh open up ah parachute while ah plot ah new course. Eef ah do a good job ah go land orn mih feet maybe even bounce back up. Eef not den de worse should be ah broken leg, maybe two eef ah real unlucky. Despite dat challenge, ah was still managin tuh do what ah does always do an keep tabs orn all tings Trini. Maybe not as intensely as always buh keep tabs none de less.

An, eef all dat wasn’t enough, ah was still dey, wid mih pardnah, discussin all de goings orn in Triniland. As always we does be doin we kind ah analysis an solvin every problem we own way.

So, despite all dat, why ah havin ah hard time jumpin back into de, A Trini Speaks pool fuh de longest?

Steups.

Is not like it eh had, an continue tuh have, endless juicy topics out dey ripe wid opportunities fuh mih tuh examine in ways different from udder people. An is not like I eh try eh. Many times too. Ah cyar count how many.

Take de Chief Justice an he various predicaments.

While ah still eh sure ah understand de nuances ah what start de larse one, ah know he get endless pong. Despite it all I admired Archie uncharacteristic Trini response of keepin he mout shut, so tuh speak, while de press carried water fuh he chief accuser. Case in point dat dotish “press conference”where it get announced he, (de accuser) did get asylum in England in what would be record time.

Is not like I eh jump up an dong when Archie say,#&@& allyuh oui, an announce he takin ah sabbatical. Den when Rowley jump up in response an say, “tuh hell yuh are“, Archie say okay vacation instead an is gorn he gorn. Who else note dat vacation go last longer dan de sabbatical he eh take?

Say what yuh want about Triniland, dat whole sordid episode was handled wid far more more class — or is it far less bacchanal — dan de current snipin between de US President an he AG. Actually between de president an anybody critical ah he.

Shouldn’t I ah jump on A Trini Speaks an explashiate orn dat point? Wouldn’t dat ah been ah clear example of lookin at tings differently?

So what was de problem?

Could it be because ah would have to re-order de solar system, put mih free-fall orn auto=pilot den oil dong mih skin before divin into A Trini Speaks?

Me an Archie is ’bago boys so how come I eh celebrate how he handle tings? Not dat eidder one ah we know what go be de state ah de country when he reach back from vacation.

He better doh look fuh no inter-island ferry tuh take he Tobago. Look how dat collapse so quick. One day it up an runnin, de next day, braps, it dong.

Okay, dat supposed tuh be ah joke. Dat ting eh collapse no overnigh; it went dong plank by plank over how long again? More shameful was de exhibition of party over island an by extension, country from de Tobago representatives in de govahment.

Take Shamfa Cudjoe. She claim since groceries in Tobago had Almond milk, de people wasn’t sufferin or someting equally as dotish. Yes, de same Shamfa who claim twice, from what I remember readin, dat one tourist worth more dan ah barrel ah oil.

Ah could ah tork about dat debacle offerin de perfect solution: Bring back de Bird ah Paradisean an de Scarlett Ibis. Ah could ah write from dat viewpoint buh didn’t . . . couldn’t. Maybe because everybody tink dem two names was only Trini birds?

Maybe ah was ready tuh write buh cheups when Stephen Williams get ah next six months tuh act as CoP. Now he somewhere near de verge ah being de longest servin TTPS head since some Colonel Hammet Fairfax Beadon. Yuh have tuh go back tuh between 1949 an 1962 tuh find he.

Anyways Williams have tuh get maybe one more extension tuh parse Randolph Urich Burroughs first doh.

I remember Burroughs. Ah was ah lil boy at de time so de way I remember dis one article about him is dat some badjohn pull ah gun orn he in Sah War an de onlyest ting he had time tuh do tuh save he life was bear hug de fellah.

Good, bad or indifferent, de poleece service ah tuhday have anybody like Burroughs? Oops, ah digressin.

Some might speculate ah cyar stomach de continuin crime situation. Ah meanin murders eh since de TTPS announce is only dat category kickin dey baxide. But me eh have ah T&T National ID card so I doh have tuh keep re-adjustin tuh new normals as demanded by criminals. So exactly what it is ah cyar stomach? Steups yes.

Buh even eef dat was true, why me eh jump orn de highest roof an shout when Paula-Mae make Trini history? Maybe it was because so many external news sources eh celebrate she as de first female president ah T&T preferrin instead tuh call she de first black female president. I eh go even bodder steupsin.

Still, why I eh call dem out? Dem offenders not in de realm ah Triniland or understand it multi-ethnic dynamics. Fuhget dem.

Why is only now ah writin anyting?

Well fuh damn sure it eh because ah dis anti-buggery rulin. While Trinidad an Tobago not ah haven tuh practitioners of dat activity, it more accomadatin in ah, doh-make-waves-wid-yuh-business kind ah way. Besides, ent de final rulin still tuh come?

Leh mih try an cut tuh de chase an ask mihself dis: Is A Trini Speak about tuh start gettin back it weekly ink? Am I goin tuh now voice mih opinion orn subjects like ministers’ family members gettin kidnapped? After all, eef dis kidnappin is as reported it represents ah dangerous escalation in one category ah crime de TTPS say decrease. Fuh now leh mih just say ah skeptical ah how de crime supposedly happen.

You kidnap ah minister chile, albeit ah step chile, an you eh tink yuh hit de mudder lode? You eh even demand half ah million? An what is wid dis request fuh friggin weed? Maybe dat right dey is why me eh write nuttin in ah while — I skeptical or is it cynical?

First answer first doh.

Ah eh plan tuh discontinue nuttin, full stop.

Buh no more haul yuh so-an-so tuh anybody tellin mih, “go bi-weekly! Go bi-weekly!”. Dat now ah viable option, at least until ah land from mih free-fall. Preferably zero out of 206 bones broken.

Meanwhile, me an mih purdah go be still dey discussin all de goings orn in Triniland.

Dat cyar done.

Never.


Comments Off on Fensic like he back or what?

Sorry, comments are closed.

Subscribe nah

Enter yuh email address. Yuh go get emails orn new posts.

April 2018
S M T W T F S
1234567
891011121314
15161718192021
22232425262728
2930  

Various topics

Torkin by month

Follow

Get every new post on this blog delivered to your Inbox.

Join other followers:

%d bloggers like this: