Reflections an Memories

Dis Christmas season my family in Triniland join all families who holidays clouded by losin ah loved one.

Fuh we was Roger.

Because he leave just before de season start, it cyar have no unbridled holiday fun fuh de people tuh who he was ah fadder or husband. Instead, fuh dem, an de udders tuh who he was brudder or uncle, dis is ah time of missin an rememberin what Christmas was like wid him arong. Is ah time fuh reflectin orn he. We have tuh shape how future Christmases go be widout him arong. It is someting people all over does have tuh do, be it at Christmas or some udder time. Leavin dat stage left is someting each ah we have tuh do an de time never appropriate.

So is reflections different from memories?

When we go dong memory lane we does leave out bard tings an sanitize udders endin up wid romanticized memories. Still, both reflections an memories does have yuh wishin fuh whatever yuh rememberin.

So, when John Lennon observe, “So Dis Is Christmas”, I not only sayin yes, ah sayin it in de way ah been doin fuh de parse few years here — sharin mih memories ah Christmases of old. . . . in T&T.

It bringin ah special smile tuh mih face as ah also reflectin orn Roger.

Each person he touch go have tuh decide which one sweeter, reflections or memories.

Enjoy eidder one nah.