RSS Feed

So, who really have people back?

Comments Off on So, who really have people back?

December 16, 2017 by Fensic

When de story first hit de news, one ah mih first torts was, “more proof he does be more rong dan right.”

De “he” being mih pardnah. De one who durin one ah we normal discussion about all tings Trini, hammer home de point dat Trinbago people smart. I take dat tuh mean not dotish.

Of course my not disagreein didn’t mean ah couldn’t help but wonder why it does look like groups of people was absent de day smartness get distributed. De copious tings happenin ah keep readin about make dat question take orn de form of ah recurrin decimal.

So when ah read dat story de first time, ah was tempted tuh shove it in mih pardnah face so ah could listen tuh him stutter ah explanation. Well ah didn’t an de story follow in de footsteps ah all stories de Trini media does cover.

Now it back.

Ah not sure eef is ah follow-up doh or is stale news now gettin reported. Eidder way dem twenty-five prison officers like dey serious.

De association insistence in takin dis battle wid de govahment tuh dis level — it eh even one ah de recognized levels buh one dey come up wid — an apply fuh asylum in Canada require mih tuh revisit mih initial first tort. Maybe even apologize tuh mih pardnah. (Nah, dat eh happenin).

So, were dey really absent when smartness was distributed?

Orn reflection, ah realize dey was at de distribution center early an probably in line twice.

Sayin what ah just say still eh easy fuh mih nah. Ah does have tuh grit mih teet, bite mih tongue an fake ah smile, all at de same time, in order tuh not blurt out dat dem prison officers is one set ah jackasses fuh pullin such ah dotish stunt.

Buh is not about how ah instinctively feel; is about dem an dey negotiatin shenanigans in ah era where shenanigans in negotiations replace tings I remember, like wukkin tuh rule.

Is not dat prison officers doh have ah case. Dey doh even have tuh make it. Is just dat case doh qualify dem fuh no asylum.

Even eef de ratio changin, I have tuh believe de majority ah people still never been inside ah jail fuh ah stay or, gorn tuh one tuh visit whoever.

De closest I been tuh one was as ah boy walkin dong Frederick Street lookin up tuh de top ah de prison wall an wonderin what would happen eef prisoners break out an run de few blocks tuh dong tong, wreakin havoc as dey went.

Ah few years, de den prisons head, Martinez, call de main jail ah hell-hole. Eef he say dat who is me tuh disagree. Anybody waverin had tuh be converted when de closest T&T have tuh ah genuine know-it-all, Professor Deosaran an he team visit de jail an he come out torkin like he wanted tuh vomit buh he diaphragm an related body parts was frozen in shock at what dey see in de jail tuh allow him tuh hurl.

By de way, I eh spend no time wonderin how he did know which ah de men he see was innocent so he could look in only dey eyes tuh see hopelessness.

De man is not ah know-it-all in joke nah.

Wid out visitin, everybody in T&T know conditions in de jail bard, at least from dem two articles. Plus, given de speed of change, chances are dey might be worse tuhday. Okay de same.

Better? Hmmm.

But, bard even primitive workin conditions eh go get no prison officer from Trinidad an Tobago any asylum in Canada.

Good because dat not de grongs dey usin tuh apply.

When dis issue defied Trinbago natural law regardin de life cycle ah news items, an it resurface is when ah find out dey usin dey fear fuh dey safety, an dat ah dey families, as dey reason.

Yes prison officers orf duty have been attacked, some murdered in recent times.

Eef I was ah prison officer dat would give me cause fuh pause. Buh fear fuh one’s life, as real as it might be, not go get yuh asylum in nobody country. Especially eef dat country, like Canada, have ah agreement wid your country, like Trinidad an Tobago, tuh help upgrade it prisons.

Never mind de article eh tork much about prison conditions. How could both sides achieve dey goal widout information about prisoner, an by extension prison officers, conditions gettin parsed?

Canada might as well name Trinidad an Tobago its eleventh province eef fear fuh one’s family could get prison officers asylum. Call de new province Trinbago.

While doin dat, find Gibbs an bring he back as CoP. Ah sure he uniform go still fit him.

As well intentioned as de Group ah 25 might be linin up outside de Canadian Embassy, dis whole episode eh nuttin but ah move tuh embarrass de bejesus out ah govahment. Even eef it mean hurtin citizens. Ah have precedence tuh back dat assertion up.

De day ah total poleecin comes tuh mind. Den it had de recent stunt pulled by de immigration officers at Piarco which end up in chaos fuh arrivin passengers. (Fuh who insist orn audio orn dat clip, farse forward tuh 00:29).

Eef it have more instances where some entity do stuff in disregard ah de hardships caused tuh citizen folks, I cyar tink ah none orf de top ah mih head.

Wait.

Dat not true at all.

Ah could tink ah one udder hardship heaped orn citizens. De entity causin it might be ah surprise as is de same entity dem udder examples was aimin tuh turn de screws orn; de govahment nah.

It could try an spin de impact orn citizens all it want, people travellin de questionable sea bridge wid disagree dey eh havin no hardships. I know about de recent experience ah one such traveler.

Ah could provide an next govahment example buh dis eh meant tuh focus orn de govahment seemingly oblivious tuh avoidable hardships it causin or, it pardnah entities doin it on purpose. Ah might as well add, not mentionin de opposition is not ah endorsement ah dey dotishness.

Ah do want tuh ask eef de govahment doh always have de people’s back an udder entities, like de Prisons, also doh have de people back, den who have de people back?

Maybe is de trade unions?

Steups.

 

 

 

 

 


Comments Off on So, who really have people back?

Sorry, comments are closed.

Subscribe nah

Enter yuh email address. Yuh go get emails orn new posts.

December 2017
S M T W T F S
 12
3456789
10111213141516
17181920212223
24252627282930
31  

Various topics

Torkin by month

Follow

Get every new post on this blog delivered to your Inbox.

Join other followers:

%d bloggers like this: